1st Sunday of Advent 2020

Sa mga kwentong pag-ibig ng mga kabataan, madalas nauuwi ito sa isang usapan kung saan ang babae ay magsumsumbong sa lalake na buntis siya. Ang lalake naman ay magugulat at mangangatwiran na hindi pa siya handa na pananagutan ito. Sa bandang huli, ang babae ay magtatanong sa lalake, “Andito na ito. Eh ano ba ang gagawin ko dito?”

 

Mga kaibigan ko kay KristoHesus, madalas ang ibinibigay na dahilan ng taong ayaw tumanggap ng isang tungkulin o pananagutan (responsibility) ay ang pagkukulang sa kahandaan o hindi pa handa. Gaya na lang ng isang mag-aaral na ayaw tanggapin na bumagsak siya sa isang pagsusulit, sasabihin niya sa kanyang mga kaklase –hindi kasi ako handa. Hindi ako nakapag-review. O kaya naman gaya ng isang manlalaro na ayaw tumanggap ng pagkatalo, sasabihin niya –hindi kasi ako handa. Kulang lang talaga sa practice.

 

Madalas ang pagiging hindi handa ay nagdudulot ng kapahamakan sa isang tao o sa karamihan. Tulad na lamang sa panahon na dumating ang isang sakuna, trahedya o kalamidad, kapag ang tao ay hindi nakapaghanda, malamang malapit na siya sa kapahamakan. Kung ang tao ngang nakapaghanda sa panahon ng sakuna, trahedya o kalamidad ay napapahamak pa eh ang taong hindi nakapaghanda pa kaya? Di nga ba at maraming frontliners kahit na mga doctor o nurse ang namatay dahil sa COVID 19? Noon, sinasabi pa sa balita na marami ang namatay dahil hindi nila napaghandaan ang pagdating ng virus na gaya ng COVID 19. Ngunit kahit ngayon, marami pa rin ang namamatay kahit pa na may face mask o face shield na ginagamit. Ang sabi nga ay hindi pa sapat ang mga ito upang ipanangga sa virus. Ibig sabihin, kulang pa rin ang ginagawang paghahanda laban sa virus.

 

Ang paksa tungkol sa paghahanda ay inilalahad din sa atin ngayon ng Mabuting Balita ayon kay San Marcos 13: 33-37. Si Hesus mismo ang nagbigay babala sa atin nang Kanyang sinabi, “Ang sinasabi ko sa inyo’y sinasabi ko sa lahat: Maging handa kayo!” Bakit daw ba? Sabi ni Hesus may isang darating kayat maging handa lagi. Ang sabi pa Niya, “Hindi ninyo alam kung kailan darating ang puno ng sambahayan –maaaring sa pagdilim, sa hatinggabi, sa madaling araw, o kaya’y sa umaga –baka sa kanyang biglang pagdating ay maratnan kayong natutulog.” Di nga bat ganito ang nangyari sa unang pagkakataon na dumating si Hesus sa mundo? Marami ang nag-abang na Judio sa pagdating ng isang Tagapagligtas pero hindi nila inaasahan si Hesus Iyon. Ayaw tanggapin ng karamihan sa mga Judio na si Hesus ang ipinangakong Tagapagligtas, ang daan tungo sa buhay na walang hanggan. Masasabing handa sila sa pagdating ng Tagapagligtas ngunit hindi nila pinaghandaan na tanggapin ang mismong dumating –si Hesus. Alam ng bawat Judio na darating ang isang Tagapagligtas at ipanganganak ng isang birhen. Nang makilala nilang si Maria ang ina ni Hesus, napagtanto nila na hindi si Hesus ang Tagapagligtas. Hinusgahan nila si Hesus na isang hamak lamang na tao dahil Siya ay anak ng isang karpintero. Sa bandang huli ipinahamak nila si Hesus upang ito ay patayin sa pamamagitan ng pagpako sa Kanya sa krus. Hindi sila naging handang tanggapin si Hesus bilang kanilang Tagapagligtas. Ang inaasahan nilang darating kasi ay yong isang ipinanganak sa templo na siya ring maging hari upang iligtas sila sa pamamahala ng Roma. Pero hindi iyon ang pamamaraan ng Diyos noong ipinadala Niya si Hesus bilang Tagapagligtas.

 

Upang maiwasang gawin ang ganitong uri ng pagkakamali, ang Simbahang Katolika ay nagsasanay na ihanda ang sarili ng bawat isa sa pagdating muli ni Hesus sa panahong tinatawag na “adbiento”. Ang “adbiento” ay may dalawang layunin na pinaghahandaan. Una, bilang isang paggunita sa unang pagdating ni Hesus na tinatawag nating Pasko ng Kapanganakan ni Kristo. Pinaghahandaan natin ang pasko sa pamamagitan ng pagdarasal, pagsisimba, pangungumpisal at pagbibigayan. Nais nating ialay kay Hesus ang ating pagbabago bilang paghahanda sa Kanyang kaarawan. Pangalawa, bilang tugon sa paanyaya ni Hesus na maging laging handa sa Kanyang muling pagdating. Sa pagkakataong iyon, Siya ay darating upang ang mga mabubuti ay makakatanggap ng buhay na walang hanggang kasama Niya sa langit. Samantalang ang mga hindi mabuti, sila naman ay hahatulan ng parusang walang katapusan sa impyerno. Mga kaibigan, sa panahong iyon, hindi dahilan ang sabihing hindi tayo handa sapagkat gaya ng isang guro, si Hesus ay magsasabi: Finish or not finish, pass your paper. Binabalaan na tayo ni Hesus noon pa man. Kayat walang dahilan upang hindi tayo maging handa.

Ang Undas

Undas na naman. Maraming Katoliko ang nagpapatulong sa kanilang pari kung paano nila sasagutin ang mga tanong ng mga di-katoliko gaya na lamang ng katanungang kung bakit naniniwala ang Simbahang Katolika sa purgatoryo. Ang payak na sagot dito ay, “ANONG PAKI NILA”. Katoliko ako at naniniwalang may purgatoryo eh ano naman ngayon? Di naman ako nakikialam sa paniniwala ng isang di-katoliko gaya na lamang ng paniniwalang huwag yumukod sa bandila kahit pa sinasabayan ito ng pambansang awit. Di rin naman ako nakialam kung ayaw kumain ng dinuguan ang ibang hindi katoliko. Mas lalong hindi rin ako nakialam kung bakit sabado o anumang araw ginagawa ang pagsamba nila sa Diyos. Bakit hindi ako nakialam? Kasi po IGINAGALANG ko ang paniniwala o pananampalataya ng bawat isa. 

Katoliko ako at dapat lang maniwala ako sa purgatoryo. Kung hindi ako katoliko, eh malamang hindi ako maniniwala sa purgatoryo. Eh ang tanong, nakasulat ba sa Bibliya ang salitang purgatoryo? Kung hahanapin ang mismong salitang “purgatoryo” sa Bibliya eh wala ngang ganoong salita na makikita. Eh kahit nga ang salitang “Bibliya” di rin naman makikita na nakasulat mula sa unang aklat hanggang huling aklat ng Bibliya! Ayon nga sa isang hindi katolikong dalubhasa sa Bibliya, ang unang gumamit ng salitang Bibliya ay si San Juan Crisostomo patungkol sa kabuoan ng luma ag bagong tipan. Kaya’t ang pamagat na Bibliya ay tumutukoy sa mga aklat mula sa lumang tipan hanggang bagong tipan. Ngayon, dahil ba sa hindi makikita ang salitang purgatoryo sa Bibliya ay hindi ito totoo? Ang salitang dinosaurs ba ay makikita sa Bibliya? Kung hindi ito makikita sa Bibliya, ibig bang sabihin nito hindi totoo ang mga dinosaurs? Mali. Hindi naman kasi lahat ay maaring makitang naisulat sa Bibliya. Ayon pa nga sa Juan 20: 30, “Marami pang mga himalang ginawa si Jesus na nasaksihan ng mga alagad na hindi nakasulat sa aklat na ito.” Ibig lamang sabihin mayroong hindi naisulat pero totoong nangyari o pangyayari. 

Pero ang katayuan ng purgatoryo ay nakakaiba sapagkat hindi man makita ang salitang ito sa Bibliya, eh si Jesus mismo ay tumutukoy na mayroong purgatoryo. Sa Mateo 5: 26 at Lukas 12: 59, sinabi ni Jesus, “Hindi ka makakalabas doong hanggang hindi mo nababayaran ang huling sentimo.” Ang kalagayang tinutukoy na ito ni Jesus ay tinatawag na purgatoryo na ang ibig sabihin naman ay pagdalisay. Ang salitang purgatoryo ay nagsasalarawan kung ano ang sinabi ni Jesus tungkol sa pagbabayad muna bago makalaya ang isang tao. Hindi impyerno ang tinutukoy ni Jesus dito sapagkat doon sa impyerno, hindi na makakalaya pa ang isang tao dahil doon na siya magpasawalang hanggan. Kaya ngayong undas, ang mga nasa purgatoryo ay ipinagdarasal natin at hindi ang mga nasa impyerno. At kahit ngayon ay Nobiembre 1, hindi rin naman masama ang magdasal sa mga nakapasok na sa langit sapagkat ang ipinagdiriwang naman natin ay All Saints Day o Araw ng mga Banal, at alam nating lahat ng kapag nasa langit na ang isang tao, siya ay maituturing na banal (saint). Mali ba ang magdasal sa isang yumao? Hindi. Sa Juan 11: 21, si Marta ay kumausap kay Jesus tungkol sa kapatid nyang si Lazarus na apat ng araw na namatay at ganoon din si Maria (Juan 11:32). Pinakinggan sila ni Jesus at binuhay nga Niyang muli si Lazarus. Sa bahaging ito ng kasulatan masasabi nating karapat-dapat lamang na tayo ay magdasal para sa mga minamahal nating yumao. Gaya ng sinabi ni Marta, “Alam ko pong mabubuhay siyang muli sa huling araw, kapag bubuhayin na ang mga namatay” (Juan 11:24), tayo ay mag-alay ng dasal sa mga yumao hanggang dumating ang huling araw na bubuhayin ng Diyos ang lahat ng mga namatay. Magdasal tayo na sa araw na iyon, magsasama-sama tayo sa iisang piging ng Diyos. Amen.