Sabado de Gloria Homily 2021

 

Byernes Santo noong taong 2008, katatapos pa lang ng prusisyon, at biglang may gumawa ng ingay sa aking likuran. Sila pala ang mga malapit kong kaibigan.  Mayroon palang nagtext na naaksidente ang 25-year-old na anak na lalake ni Ms. Cristy. Hindi siya agad naniwala sapagkat alam niyang nagpapahinga sa bahay nila ang kanyang anak. Ngunit kalaunan nalaman niya na may sumundo sa anak niya at pilit na isinama sa lakaran at doon na nga naganap ang malagim na pangyayari. Namatay sa aksidente ang kanyang anak.

Kinabukasan, nakapunta pa ako sa burol ng kanyang anak bago pumunta ng paliparan pauwi ng Aklan. Sabi sa akin ng kasama ko na pagpayuhan (i-counseling) ko daw si Ms. Cristy upag maibsan ang kanyang pagdadalamhati. Subalit wala akong imik na tiningnan lamang si Ms. Cristy habang siya ay umiiyak. Ano bang sasabihin ko? Sasabihin ko bang tanggapin na lamang niya ang kalooban ng Diyos? Kalooban ng Diyos? Di nga bat nagdarasal siya araw-araw sa simbahan upang ilayo ang kanyang mga mahal sa buhay sa kapahamakan? Kaya nga siya ay nagpapakabuti bilang isang ina upang mabiyayaan ng Diyos. Tapos ang kalooban pala ng Diyos ay patayin ang kanyang anak? Bakit di na lang yong mga di pumupunta sa simbahan o di kaya ang mga manloloko sa kanilang asawa ang kunin ng Diyos? Mahirap sa gaya kong pari ang magsalita sa taong mahirap unawain ang pinagdadaanan gaya ni Ms. Cristy.

Mga utol ko kay KristoHesus, kahit mahirap man bigyan ng payo ang mga katulad ni Ms. Cristy, kailangan maipaalam sa kanila ang pinagdaanan din ni Hesus. Sa loob ng Kwaresma, nagmumuni-muni tayo kung anong hirap ang pinagdaanan ni Hesus. Hindi natin mauunawaan kung bakit mangyayari ang isang masamang pangitain sa isang mabuting tao. Pinagtaksilan Siya ni Hudas at tinalikuran naman ni Pedro. Nagtago ang ibang mga apostoles habang sinasaktan ng mga sundalo si Hesus. Ipinako Siya sa krus at wala man lang ni isa ang tumanggol sa Kanya. Namatay Siya at inilibing. Ngunit sa ikatlong araw, Siya ay muling nabuhay (Marcos 16:1-7). Ang muli Niyang pagkabuhay ay nagbibigay sa atin ng pag-asa at gabay kung paano mamuhay bilang Katoliko. Matutunan din natin na sa Kanyang muling pagkabuhay si Hesus ay nagpatuloy sa Kanyang layunin (move on) at hindi nanatili sa Kanyang libingan. Si Hesus ay kusang nagpatawad at hindi bumalik upang maghiganti o sumingil sa mga nanakit sa Kanya. Si Hesus ay nagpahayag ng magandang balita at di bumalik upang sumbatan ang lahat sa kanilang ginawa laban sa Kanya.

Sa Sabado de Gloria, tayo ay hinihimok ng Simbahan na sundan ang yapak ni Hesus hindi lang sa Kanyang pagpapakasakit kundi hanggang sa Kanyang pagkabuhay muli. Kung tayo man ay may mga masamang pinagdadaanan o napagdaanan, kung maari namang wag nang balikan ang taong nagdulot sa ating ng kabiguan, mag-move on na lang kasama ng mga taong nagmamahal sa atin. Kung mayroon mang taong nakagawa ng kasamaan na mahirap kalimutan, patawarin na lang at wag nang pag-usapan pa. Kung may mga taong hindi tayo sinuklian ng kabutihan kahit tayo ay naging mabuti sa kanila, ipagpatuloy na lang natin ang mamuhay na nagbibigay saya sa mga umaasa sa atin. Kagaya ni Hesus, wag nating pahirapan ang ating mga sarili na nakakulong sa pait ng nakaraan. Tayo ay maging malaya sa mga masamang nangyari sa atin at maging sanhi at dahilan ng kasiyahan ng ating kapwa sapagkat gaya ni Hesus, pagkatapos nating pagdaanan ang hirap, harapin natin ang katotohanan na may bagong buhay.

Ayon sa Roma 8:28, “At nalalaman natin na ang lahat ng mga bagay ay nagkakalakip na gumagawa sa IKABUBUTI ng mga nagsisiibig sa Diyos…” Kung kagaya ni Hesus tapat din tayo sa pagmamahal natin sa Diyos, ating uunawain na lahat ng kaganapan sa ating buhay ay para sa ikabubuti ng ating kaluluwa. Happy Easter.

Sabado de Gloria 2021

 

Sabado de Gloria –nasa kalagitnaan ng Mahal na Araw at Pasko ng Muling Pagkabuhay ni Hesus. Sa gabing ito magninilay-nilay ang mga katoliko na huwag mawalan ng pag-asa kahit na hindi nila nauunawaan kung bakit at ano ang nangyayari sa buhay nila.

Ang tunay na pag-asa ay galing sa muling pagkabuhay ni Hesus. Ang sabi nga sa Corinto 15:17, “Kung hindi muling binuhay si Hesus, walang kabuluhan ang inyong pananampalataya at kayo’y nasa inyong mga kasalanan pa”.

Kaya’t magsisimula ang mga kaganapan sa Simbahan sa gabing ito na may bagong apoy na nagbibigay liwanag sa lahat. At ang liwanag ng tao ay di lamang galing sa apoy kundi sa Salita ng Diyos. Pagkatapos makita ng mga mata ang liwanag at marinig ng mga tenga ang Salita ng Diyos, tatanggapin ng mga Katoliko ang bagong hininga ng buhay sa pagpapanibago nila ng kanilang panata sa kanilang binyag at pagtanggap sa Katawan ni Hesus na nagbibigay ng buhay na walang hanggan. Lahat ng ito ay mga gawaing nagpapahiwatig ng pag-asa ng tao na makikita lamang sa Diyos. Mainam na sa gabing ito ay nakasuot ng puting damit ang mga katoliko upang ipagdiwang ang bagong buhay nila kay Hesus na muling nabuhay. Happy Easter!

Biyernes Santo 2021

 

Biyernes Santo –ito ang araw na ginugunita ng mga Katoliko ang pagpapakasakit ni Hesus hanggang Siya ay ipinako sa krus at namatay upang iligtas ang sanlibutan sa kasalanan. Ito ang araw na sinasabing walang misa. Ngunit sa totoo, ang liturhiya sa hapon ng Biyernes Santo ay BAHAGI ng Triduo na nagsimula noong Huwebes Santo kung kayat dapat na mula Huwebes Santo hanggang sa Sabado de Gloria ang mga Katoliko ay sumali sa pagdiriwang sa Simbahan sa loob ng tatlong araw. 

Ang via crucis at prusisyon ay iilan sa gawain sa Simbahan sa araw na ito upang ipaalaala sa mga tao ang pagpapasakit ni Hesus at ang pagpako sa Kanya sa krus hanggang Siya ay namatay at ililibing. Sa kadahilanang nasa New Normal ang lahat ngayon, hindi lahat ng Katoliko ay makakapagbahagi o makasali sa mga idinaraos sa Simbahan. 

Subalit maaaring ang mga may “caro” (andas) ay ipalabas nila sa kanilang mga bahay o sa bahagi ng bahay na makikita ng mga taong maaring tumigil ng sandali at magdasal. Maaari din naman puntahan ng mga pari ang mga “caro” upang basbasan ito. Caveat: Hindi inilalabas ang mga “caro” na para bang sumasali sa isang paligsahan sapagkat ang mga ito ay “sagrado” na humihimok sa mga tao na magnilay-nilay at magdasal. Hindi ginagamit ang mga bagay na banal sa makamundong paraan. 

Kung wala namang “caro”, maaaring gumawa ng krus o maglagay ng tarpaulin sa labas ng bahay upang ipahayag na ang nakatira sa bahay na iyon ay taimtim na sinasariwa ang pagpapasakit ni Hesus upang tubusin ang sanlibutan.