2nd Sunday of Lent

 

Noong nakaraang Linggo, naipinaliwanag na natin na ang “Kwaresma” ay tumutukoy sa apatnapung araw na paghahanda para sa Pasko ng Muling Pagkabuhay ni Hesus. Bilang mga Katoliko, ang apatnapung araw ay ginugugol natin sa pag-iwas sa mga tukso at pagpipigil sa ating sarili na gumawa ng kasalanan. Bilang tao, mahirap ang lumayo sa tukso at iwasan ang magkasala. Ngunit lingid sa kaalaman ng karamihan, may mas mahirap pa sa kalagayan ng isang taong nais umiwas sa kasalanan.

Paano ito masasabi? Sapagkat ang taong umiiwas na magkasala ay walang ibang dapat gawin kundi ang huwag gawin ang isang masama. Tulad na lamang ng isang nangangaliwang asawa, kung hindi siya maghahanap ng ibang babae o lalake, eh hindi siya magkakasala. Alam niyang masama ang pangangalunya at kailangan lang na hindi niya gagawin ito. Kung ihahambing natin ang kalagayang ito sa kalagayan ng isang taong iniisip na “hindi naman masama” ang kanyang ginagawa, kay dali ang umiwas sa tukso na huwag gumawa ng masama. Pero ang taong may buong akala na walang masama sa kanyang ginagawa ay hindi niya namamalayan na siya pala ay nagkakasala na.

Upang maunawaan ang pagkasabi nito, masdan natin ang nakasaad sa Banal na Kasulatan (Marcos 9:2-10). Nakita nila Pedro sina Moises at Elias na nakikipag-usap kay Hesus. Sa mga oras ding iyon, sinabi ni Pedro kay Hesus, “Guro, mabuti pa’y dumito na tayo. Gagawa po kami ng tatlong kubol: isa sa inyo, isa kay Moises at isa kay Elias.” Walang masama sa sinabi ni Pedro. Hindi kasalanan ang gumawa ng kubol para sa tatlo. Ganun pa man, bigla na lamang na may nagsalita mula sa langit at ang sabi, “Ito ang minamahal kong Ana. Pakinggan ninyo Siya!” Dito isinasalarawan na hindi masama ang gumawa ng hindi masama ngunit kailangan pagnilayan muna ang mga ito bago gawin kung ito nga ba ay kalooban ng Diyos na dapat gawin. Gaya na lamang sa mga nagsasabing hindi naman masama ang maniwala sa albularyo. Hindi nga masama pero kalooban ba ng Diyos na paniwalaan ang gawain ng isang albularyo? Hindi nga masama ang magbigay-alay sa nuno sa punso, pero ayon ba sa kalooban ng Diyos na paniwalaan ang ganito? Hindi masama ang magbigay sa mga batang kalye na humihingi ng pera sa mga dumadaang sasakyan, pero naaayon ba sa kalooban ng Diyos ang pagbigay sa kanila sa panahong iyon at sa ganoong pamamaraan?

Ngayon, tanungin natin ang ating sarili kung tayo ba ay gumagawa ng hindi naman masama, ipinagdadarasal ba muna natin na ang ating gagawin ay naaayon sa kalooban ng Diyos? Kaya sa panahon ngayon ng Kwaresma, ihanda natin ang ating sarili na makinig kay Hesus sa pamamagitan ng pagninilay sa mga palatandaan ng panahon. Hindi lang marapat ang gumawa ng mabuti ngayon Kwaresma, kundi kailangan gawin ito ayon sa kalooban ng Diyos, sa tamang panahon, sa tamang lugar at sa tamang pamamaraan. Amen.