1st Sunday of Lent 2021

 

Ang “Kwaresma” ay tumutukoy sa apatnapung araw na paghahanda para sa Pasko ng Muling Pagkabuhay ni Hesus. Bilang mga Katoliko, ang apatnapung araw ay ginugugol natin sa pag-iwas sa mga tukso at pagpipigil sa ating sarili na gumawa ng kasalanan. Bilang tao, mahirap ang lumayo sa tukso. Lahat ay nagkakasala. Ngunit hindi ito dahilan upang talikuran ang anyaya ni Hesus na sundan ang yapak Niya. Kahit na si Hesus ay Anak ng Diyos, ipinamalas Niya sa atin na kahit Siya ay hindi pinalampas ng tukso (Marcos 1:12-15).

Sa Unang Linggo ng Kwaresma, ipinakilala sa atin si Hesus hindi bilang isang Anak ng Diyos kundi bilang kalaban ng tukso at kasalanan na siya namang gawain ni satanas. Si satanas ay totoo at hindi kathang-isip lamang. Hinihikayat niya ang isang tao na gumawa ng kasalanan sa pamamagitan ng isang tukso. Ang tukso ay hindi isang kasalanan ngunit ang pagkahulog sa tukso ng isang tao, doon na siya nagkakasala. Walang magkakasala kung walang tukso. Walang tukso kung wala si satanas. Ngunit mayroong satanas! Hindi natin makakayang gapiin si satanas bilang isang tao dahil sa ating kahinaan. Kaya marapat lamang na tawagin natin ang makakatalo kay satanas upang tulungan tayong ilayo sa tukso at Siya ay walang iba kundi si Hesus. Si Hesus ay tinukso ni satanas ngunit hindi Siya nagkasala. Si Hesus ang Siyang tagapagligtas natin laban kay satanas.

Subalit bilang tao, kahit anong iwas ang gawin natin sa mga tuksong dumarating, may pagkakataon na nagkakasala tayo. At sa mga pagkakataong nahuhulog tayo sa kasalanan, natutuwa si satanas sa kanyang panalo. Pero bilang Katoliko, hindi tayo nawawalan ng pag-asa na umahon sa pagkakasala. Si Hesus na mismo ang nagbigay sa atin ng daan upang mapapatawad ang ating pagkakasala. Sa pamamagitan ng Sakramento ng Pangungumpisal, hindi na tayo malulugmok pa sa pagkakasala. At sa tuwing tayo ay nangungumpisal, unti-unting nawalan ng saysay ang pagkapanalo ni satanas sapagkat tayo ay naiahon na ni Hesus sa ating pagkakasala. Ngunit si satanas ay gaganti. Babalik at babalik siya na nagpapadala ng maraming tukso upang sa bandang huli mapasakanya ang mga taong nagkasala at namuhay na sa kasalanan. Ang pinakamadaling tukso na nagagawa ni satanas ay ang sabihin sa tao na di kailangan ng tao ang Sakramento ng Pangungumpisal. Pero, ano ang dapat gawin ng tao pagkatapos niyang mahulog sa kasalanan kung hindi kinakailangan ang pangungumpisal? Masdan niyo po ang taong hindi na nangungumpisal, hindi na sila pinapadalhan ng tukso ni satanas kundi sila na ang kusang humahanap at lumalapit sa tukso hanggang sa bumulagta na lang sila sa dinami-daming kasalanang nagawa.

Ngayon, tanungin natin ang ating sarili kung natutukso pa ba tayo o tayo na ang kusang umaanyaya sa tukso? Nagkakasala pa ba tayo? Kung oo, si Hesus lamang ang makakatulong sa atin. Kaya sa panahon ngayon ng Kwaresma, ihanda natin ang ating sarili na umiwas sa mga tukso at sa paggawa ng kasalanan sa pamamagitan ng mga biyaya na dulot ni Hesus.