MGA KASAGUTAN SA HINDI PA NAITANONG TUNGKOL SA KWARESMA

 

1.     Ang mga nagpa “badlis” o nalagyan ng abo sa noo lang ba ngayong Miyerkules Badlis ang s’yang dapat magbigay ng abuloy, mag-aayuno at umiwas sa ilang uri ng pagkain?

SAGOT: Lahat ng Katoliko na nagpa “badlis” o hindi ay kailangang mag-ayuno at umiwas sa ilang uri ng pagkain simula sa araw ng Miyerkules Badlis maliban sa mga Katolikong hindi nasasaklaw ng kautusang ito. Kung ang mga may “badlis” lang ang mag-aayuno, para na ring sinabi na ang mga lalakeng may asawa lamang ang bawal mambabae. Eh sa totoo lang mali ang paglaruan ang puso ng mga babae kahit pa ang lalakeng gumagawa nito ay binata o may asawa na.

2.   Saan makikita ang kautusang ito?

SAGOT: Mababasa ito sa Code of Canon Law o Kautusan ng Simbahan (Canon 1251) na nagsasabi: Ang pag-iwas sa karne o sa mga ibang pagkain na tinutukoy ng Episcopal Conference, ay dapat sundin sa LAHAT NG BIYERNES, maliban kung ang isang “pyesta solemne” ay nahulog sa araw ng Biyernes. Ang pagpipigil at pag-aayuno ay DAPAT SUNDIN SA MIYERKULES BADLIS at BIYERNES SANTO. Ang itinakdang araw at hindi ang akma ng pag “badlis” o paglalagay ng abo sa noo ang hudyat ng pag-aayuno at pag-iwas sa ilang uri ng pagkain.

3.   Ano ang pinagkaiba ng Katolikong may “badlis” o abo sa noo sa Katolikong hindi nagpa “badlis” kung pareho rin lang naman na dapat sila mag-ayuno at umiwas sa ilang uri ng pagkain?

SAGOT: Ang pag “badlis” o paglagay ng abo sa noo o ‘yon mismong abo sa noo ay itinuturing na “sacramental”. Sa pamamagitan ng “sacramental” pinaghahandaan ng isang Katoliko ang pagtanggap ng kung ano mang biyaya mayroon ang mga banal na sakramento at dagdag pa rito, ang bawat pagkakataon sa kanyang buhay ay ginagawa niyang banal. Gaya na lamang ng pagpabasbas ng sasakyan. Hindi naman kailangan ang “holy water” upang tumakbo ang sasakyan. Pero pinapabasbasan ng Katoliko ang sasakyan upang italaga ito sa Maykapal. Ang gamit na “holy water” ay isang sacramental.

4.   Sino ba at ano ang ginagawa ng isang nag-pafasting (ayuno)?

SAGOT: Ang isang Katoliko na sa gulang na 18 hanggang 59 ay kinakailangan mag-ayuno. Ang pag-aayuno ay ang kumain sa itinakdang araw ng pag-aayuno ng isang “One full meal” at “Two light meals”. Paano ito sinusukat kung “full” o “light”, ang sariling budhi na lang ang makakasagot.

5.    Sino ba at ano ang ginagawa ng isang nag-aabstinence (pag-iwas sa ilang pagkain gaya ng karne)?

SAGOT: Ang isang Katoliko na sa hustong gulang na 14 o higit pa ay kinakailangan umiwas sa pagkain ng karne o sa anumang ipinagbabawal na kainin sa araw na itinalaga ang pag-iiwas nito.

6.   Saan makikita ang mga kautusang ito?

SAGOT: Mababasa ang mga ito sa Code of Canon Law o Kautusan ng Simbahan (Canon 1252) na nagsasabi: Ang batas sa pag-iwas sa uri ng pagkain na ipinagbabawal kainin ay nagbubuklod sa mga nakatapos ng kanilang 14 (age) na taon. Ang batas ng pag-aayuno ay nagbubuklod sa mga nasa wastong gulang (age of majority) hanggang sa simula ng kanilang ikaanimnapung taon.

7.    Kasalanan ba kapag hindi nakapag ayuno o nakaiwas sa pagkain ng karne?

SAGOT: Opo. Dahil may batas na nagsasabi na kinakailangan mag-ayuno o umiwas sa ilang uri ng pagkain ang isang Katoliko, at ang hindi pagsunod sa batas na ito ay nagkakasala. Subalit walang karampatang parusa sa kasalanang ito sapagkat hindi naman tinalakay sa Canon Law kung ano ang parusa dito. Ibig sabihin, nasa budhi na lamang ng bawat isa ang pagsunod nito.

8.   Kasalanang MORTAL (mortal sin) ba kapag nakakain ng karne sa mga araw ng itinakda?

SAGOT: Ang mga araw na itinakda upang ang isang Katoliko ay umiwas sa pagkain ng mga ipinagbabawal ay LAHAT ng Biyernes sa loob ng isang taon at mas lalo na sa Miyerkules Badlis at Biyernes Santo, hindi lamang pag-iiwas sa pagkain kundi ang pag-aayuno rin ay kinakailangang gawin.

Maaaring maging mortal na kasalanan ang hindi pag-aayuno o pag-iiwas kumain ng ipinagbabawal kung ipinagwawalang-bahala ng isang Katoliko ang kautusan ng Simbahan na para bagang hindi siya isang Katoliko at nilalapastangan niya lang ang turo ng Simbahan.

9.   Mabigat bang kasalanan kapag nakakain ng karne ang isang Katoliko lalo na sa mga araw ng Byernes ng Kwaresma?

SAGOT: Maaaring malaking kasalanan kung ituring ang hindi pag-aayuno at pag-iiwas sa ipinagbabawal na kainin sa araw ng Miyerkules Badlis at Biyernes Santo. Pero sa ibang mga araw ng Biyernes, hindi masasabing kasalanan nga ang kumain ng karne. Sa halip na umiwas sa mga ipinagbawal na pagkain, maaaring gumawa na lamang ang isang Katoliko ng ibang pamamaraan ng pagpapakasakit sa sarili (self-denial) na ang katumbas pa rin nito ay ang diwa ng pagsisisi. Kapag walang kapalit na may katumbas na pagsisisi, ang pagkain ng karne ay maaaring ituring na kasalanan.

Mababasa ito sa Code of Canon Law o Kautusan ng Simbahan (Canon 1253) na nagsasabi: Maaaring matukoy ng Episcopal Conference ang mas natatanging mga paraan kung paano dapat isakatuparan ang pag-aayuno at pagpipigil sa pagkain. Sa halip na magpigil o mag-ayuno, maaari itong palitan, sa kabuuan o sa bahagi, ng iba pang mga anyo ng pagsisisi, lalo na sa pamamagitan ng paglilingkod sa kapwa at ng banal na mga gawain.

10. Nasa Bibliya ba ang mga gawaing ito?

    SAGOT: OPO! Ayon kay San Lucas 9: 23-24: At sinabi ni Hesus sa kanilang lahat, “Ang sinumang nagnanais sumunod sa akin ay kinakailangan itakwil niya ang kanyang sarili, pasanin araw-araw ang kanyang krus, at sumunod sa akin.”